Engar geimverupælingar hér..

Kreppa? Held nú ekki...

Wed, 05 Nov 2008 15:07:59 GMT

Já það er sko alls engin kreppa hjá okkur sauðsvörtum almúganum. Við skelltum okkur í einhverja stærstu húsgagnabúð landsins um helgina og þar var óheyrilega mikið af fólki að kaupa allan fjandann og gátum við nú ekki verið minni menn, því jú sannir Íslendingar þurfa alltaf að vera stærri, betri & ríkari en náunginn, og splæstum við því í nýtt eldhúsborð & veglega stóla. Vissulega hitnaði kortið við þennan hamagang en ég er nú ekki frá því að það hafi bara gott af góðri upphitun fyrir komandi hátíð eyðslu, söngva & ljósa, svo það brotni ekki undan álagi. Annars er ég mjög hrifinn af nýja peningaseðlinum og er aldrei að vita nema maður fari að nota þá óspart á komandi dögum.

fátæklingurinn í fínu íbúðinni

Allt í rugli

Fri, 10 Oct 2008 16:35:03 GMT

Já, ekki er nú furða að maður nenni nokkuð að krota hérna inn, þjóðfélagið í rugli og allt á öðrum endanum.

En ef við lítum aðeins framhjá því, þá tókst okkur að koma hjólunum undir fjórhlauparann í vikunni og nú þarf bara að finna út úr kraftleysinu og þá verður hægt að þeysa um fjöll og firnindi.

Persónulega er ég búinn að renna tvisvar norður í göngur og eitthvað reynt að liggja fyrir gæsum, einhverjar féllu en engin stórvirki voru unnin.

Svo fékk ég þessa frábæru greiningu á miðvikudaginn að ég gæti hugsanlega verið með brjósklos, ekkert er þó öruggt í þeim efnum.

Þrefalt þrítugsafmæli bíður manns svo í kveld og einhver fleiri stórvirki um helgina.

Alltofuppteknimaðurinnsemerennmeðvinnu

Allt á fullu

Fri, 29 Aug 2008 15:20:09 GMT

Það er bara alltof mikið að gerast hjá manni til að ég nenni að skrifa allt sem á daga mína hefur drifið síðan síðast, heyskapur í sveitinni, eyjar, útilega, ættarmót og ég veit ekki hvað, einhverjar myndir eru á picasaweb. Núna á eftir er það Death Valley og svo eru það bara gæsaveiðar og göngur allar næstu helgar, sé til hvað ég nenni að krota um það.

Upptekni maðurinn

Sveitasælan kallar

Thu, 24 Jul 2008 13:36:09 GMT

Það er ekkert annað en sveitasælan sem kallar um komandi helgi, stefnan er sett beint norður í sveitina í heyskap og kósýlegheit, ekki amalegt það. Einhver breyting er á ferðafélögum, en engu að síður verða það þrír galvaskir ferðalangar sem leggja land undir dekk, þ.e. ég, húmoristinn og hvuttinn.

En hvað um það, búið er að negla ferðaplan Verzlunarmannahelgarinnar og verður það með sama sniði og í fyrra, þ.e. Bakkaflug til eyja vestu manna. Á ekki að mæta?

Svo svona til að koma fólki í gott skap fylgir hérna ein mynd af Gulla eftir að hann var handjárnaður fyrir óspektir á almannafæri

Íslandsflakkarinn

Grillandi snilld

Fri, 18 Jul 2008 15:47:15 GMT

Það er ekki annað hægt að segja að nú sé grillvertíðin í hámarki, mætti til foreldra Sissó í gær í smá afmælisgrill og svo verðum við með annað alvöru afmælisgrill í kveld.

Einnig er vert að minnast á tónleikana sem ég fór á í gær. Þar stigu á stokk Kuroi & Dikta, ég get nú ekki sagt annað en það verði spennandi að fylgjast með Kuroi í framtíðinni, svona þegar þau verða betur búin að stilla sig saman, finna hljóminn og fá meiri tónleikaæfingu, engu að síður flott band og fín tónlist. Dikta hefur ekki haldið tónleika í langan tíma en það er augljóst að þeir hafa töluvert meiri reynslu í þessu, þó hefði ég viljað að volume-ið hefði verið aðeins lægra því það surgaði full mikið í hátölurunum. En það var hrikalega gaman að fylgjast með þeim og lofar nýja efnið mjög góðu. Það fór samt ekkert á milli mála að mikið var um aðdáendur þeirra á staðnum, því þegar þekktustu lögin hljómuðu ætlaði þakið að rifna af staðnum.

Svo má nú ekki gleyma að minnast á hvaða vitleysu G.I. Stones er farin í... Hell Weekend. Lesendur ættu nú að kannast við þáttinn sem var á Skjá Einum í fyrra, þetta er sama tóbakið, nema þetta á að vera helmingi erfiðara núna samkvæmt yfirlýsingum þessara Navi Seals kalla. Ég efast samt ekki um að Steina rúlli þessu upp, fari létt með þetta og hlæji svo að þeim :haha:

Hverjir klikkuðu svo á Fínum Flöskudegi??

Framtíðar Formaður Fínna Flöskudaga

Brandarakallinn á afmæli

Wed, 16 Jul 2008 12:38:55 GMT

Ammli hamingju til með gamli!!

Jæja þá er það afgreitt, en ekki veit ég nú hverju hún systir mín býst við að sjá hérna, ég hef lagt það í vana minn að krota niður einhverja punkta í kringum mín áhugamál, hinar ýmsu ferðasögur sem þeim fylgja og svo villist stundum inn einhver færsla um líðandi stund, svo er hún bara leiðindi... koddu þá bara með eitthvað skemmtilegt sjálf!!!

En hvað um það, þá er búið að taka ákvörðun um Eyjar 2008, býst ekki við neinu öðru en að það verði stök snilld eins og síðast. 8)

Svo að sjálfssögðu er búið að bilanagreina fjórhlauparann og nú er bara að fara að betla á götum úti til að reyna að skrapa saman fyrir varahlutakostnaði

Upptekni maðurinn

Ævintýraferð fyrstu helgina í júlí 2008

Wed, 09 Jul 2008 18:38:09 GMT

Já það er nú ekki annað hægt að segja en að ævintýrin virðist elta okkur Sissó í þessum veiðitúrum okkar. Nú síðast var förinni heitið upp í Veiðivötn og var ekki amalegur hópur sem lagði í þá för. Í fjórhlauparanum, öðru nafni ævintýrabílnum, voru ekki ómerkari menn en undirritaður, Sissó brandarakall & Ingi stemmningarstjóri. Í landkönnuðinum, öðru nafni öryggisbílnum, voru allir hinir vitleysingarnir, Main Muncher-inn, Tuner-inn, Mr. Iceland & Happy Fisherman.

Með í för var fjögurradekkjahjól skemmtanastjórans, sem hafðist að setja saman kvöldið fyrir brottför. Ekki vorum við komnir í Veiðivötn þegar ferðaáætlunin tók óvænta stefnu því okkur var boðið að fara í Víðidalsánna og var sú ákvörðun tekin að renna bara yfir Sprengisand daginn eftir og ná seinni vaktinni. Kílómetrunum hafði ekki fjölgað mikið þegar kerran tók upp á því að byrja að detta í sundur, í raun má segja að annar af tveim mikilvægustu boltunum sem hægt var að losa hafi losnað og hún var við það að liðast í sundur, okkur tókst þó að tjasla henni saman og komast á leiðarenda.

Veiðivötn
Við fyrsta kast í fyrsta vatninu sem við fórum í, kom fyrsta takan og í framhaldi af því fyrsti fiskurinn á land. Lofaði túrinn strax góðu, þó veðrið væri ekki til að hrópa húrra fyrir og fyrsti fiskurinn ekki af stærstu gerð. Voru nokkrir staðir reyndir fram eftir degi, einhverju slori landað, hjólið prófað til hins ýtrasta & frábær stemning mynduð í hópnum. Um kvöldið var svo að sjálfssögðu grillað með tilheyrandi sögum, spilamennsku og skemmtilegheitum. Daginn eftir, er veðrið lék við hvurn sinn fingur, voru nokkur vötn barin og höfðust uppúr krafsinu nokkrar bleikjur og mjög vænn urriði, sá stærsti sem við höfum náð þarna, 6.2 pund og spurningin er hvort hann hafi bara dáið úr hlátri þar sem brandarakallinn átti heiðurinn af honum. Einnig tókst okkur að fá almennilega ró á vandræðaboltann úr kerrunni og var það til friðs það sem eftir var ferðar (en á þessu var tjekkað reglulega, eins og fleiru).

Sprengisandur
Áður en beygt var inn á Sprengisand, byrjaði vesenið. Annað brettið á kerrunni alveg við það að detta af og endaði það með því að við rifum það af, ætli það hafi ekki liðið 30-60 mínútur þar til hitt brettið var komið af líka. Til að byrja með voru þau bara fest á kerruna, svona þar sem hjólið var ekki að nýta plássið, en enduðu svo inn í bíl þegar þau voru farin að skera böndin í sundur. Leið nú langur tími án áfalla en svo fór á endanum að Skemmtanastjórinn ákvað að herða aðeins á kúplingunni í hjólinu, tókst það án skakkafalla og áfram héldum við för sem leið lá. Eftir mikið hjakk fóru nú að heyrast einhver skrítin hljóð í fjórhlauparanum, sem talið var að væru afturbremsur að syngja sitt síðasta, ekkert var aðhafst að svo stöddu, þar sem ekki var mikið um töfralausnir á miðju hálendi Íslands.
Að lokum kom sá tími að við fórum að skríða niður af hálendinu og ekki tók þá betra við, bremsurnar tóku lítinn þátt í hjálpa okkur niður snarbratta hlíð sem hafði þónokkrar U-beygjur, svartaþoku & ekkert nema þverhnípi í kring, en áfram skröltum við þó & komust niður þökk sé traustum skipstjóra. Eftir sem áður þá áttum við í mestu vandræðum með að hafa augun af bensínljósinu, sem logað hafði í dágóða stund og hélt okkur ríghaldi milli vonar & ótta. Dalurinn virtist endalaus, en sem betur fer þéttist byggðin stöðugt, með aukinni öryggistilfinningu héldum við ótrauðir áfram og treystum á að komast á næstu bensínstöð. Því miður höfðum við ekki erindi sem erfiði, því fjórhlauparinn var alveg skrælnaður eftir þetta gríðarlega brölt yfir eyðimörkina í steikjandi sól & hita. Eftir stutt spjall við þýskar hryssur var ákveðið að drepa á dyr á næsta bæ og fengum við þær frábæru fréttir að ekki væru nema 25 km í næstu bensínstöð, en pappakassarnir sem þarna bjuggu gátu nú ekki hjálpað okkur þar sem átti að fara að nota bílinn, btw þá voru nú ekki nema 4-5 bílar á hlaðinu og trúi því ekki að allir hinir hafi verið ónýtir. En hvað um það, Skemmtanastjórinn sá sér vænstan leik á borði að bruna eftir eldsneyti á hjólinu og tókst það með eindæmum vel, ef frá eru talnir frosnir fingur.

Blönduós
En héldu skakkaföllin áfram, því áður en okkur tókst að sigla inn í þetta litla byggðarfélag, þá fóru aftur að heyrast furðuleg hljóð í bílnum og ég fann öðruhvoru eins og eitthvað væri að höggva í drifbúnaðinum. Eftir miklar vangaveltur var skrölt áfram inn á Blönduós og áð fyrir utan kaupfélagið. Var strax hafist handa við að rífa dekkið undan, þar sem felga og bremsuskál voru orðin sjóðandi heit. Skemmtanastjóranum tókst að stoppa eina bílinn á ferðinni, fullum af innfæddum og fékk þá til að skjótast með sér að sækja meira eldsneyti á sjálfan sig. Er þeir komu til baka, kom í ljós að hluti þeirra hafði áhuga á faraskjótum og störfuðu meira að segja við umhirðu þeirra. Það var ekki búið að biðja um hjálp þegar þeir voru farnir aftur að sækja verkfæri og búnir að rífa meira í sundur til að hjálpa okkur að komast á ferð aftur. Eftir slatta grúsk var öllu tjaslað saman aftur, þakkað pent fyrir aðstoðina & siglt af stað aftur. Lá leið okkar nú bara þann stutta spöl sem eftir var í Víðidalinn, en allt kom fyrir ekki, auðvitað byrjuðu lætin aftur og nú af meiri krafti en áður. Er við láum í símanum við meinta hirðinga fararskjóta, mætti lögregluveldi Blönduósbúa og bauð fram aðstoð sína. Þó svo að engin hjálp hafi verið í þeim, þá var samt gott að vita til þess að allir væru til í að leggja hönd á plóg. Kom okkur mikið á óvart að veldið skyldi ekki efast um ástand skipstjórans, en engu að síður endaði þetta stopp okkar með því að við sigldum af stað aftur og áðum ekki fyrr en á leiðarenda.

Víðidalsáin
Eftir tæplega 3 tíma svefn voru veiðimennirnir mættir út til að berja ánna með augum og beitu. Voru varla liðnir 3 tímar þegar fyrsti laxinn synti á land eftir öruggri leiðsögn skipstjórans. Strönduðu ekki fleiri laxar fyrir hvíldina, en hvíldartíminn var vel nýttur með skottúr á Blönduós til að svekkjast yfir því að eldsneytisbúðin þeirra væri lokuð og allt rifið undan fjórhlauparanum aftur. Tókst brandarakallinnum að finna líklega ástæðu fyrir bilun með því að hrista öxul, og við það settist fjórhlauparinn næstum því á hann. Upp með helvítið aftur, hendum þessu saman og spáum í þessu síðar. Tókst okkur að mæta á réttum tíma eftir hvíld út í stórbrotið landslagið aftur, til þess að njóta snarbiluðu veðurblíðunnar og dást að stórlöxunum sem syntu um þessa kyngimögnuðu á. Kvöldið var svo nýtt til að hvíla lúin bein í heitum potti, borða veislumat og hlusta á veiðisögur & ævintýri.
Sunnudagsmorgninum var eytt úti í náttúrunni fram eftir degi, þar til veiðitíma lauk, að vísu án þess að setja í slor, þó svo að við yrðum varir við það. Því næst var pakkað saman og fengið far í bæinn, já fjórhlauparinn var skilinn eftir.

Björgun fjórhlauparans
Að sjálfssögðu var strax farið að huga að björgunaaðgerðum fyrir strandaðann fjórhlaupara og í fyrstu tilraun var brunað af stað, upp í Borgarfjörð þar sem beið okkar björgunarbíll, sem reyndist svo vera bilaður. Var miklum tíma eytt í að reyna að koma honum í lag, en endaði sú björgunaraðgerð með því að gefist var upp og ákveðið að reyna aftur síðar. Leið og beið eitt stykki sólarhringur þar til farið var af stað aftur, en í þetta skipti á björgunarbíl úr bænum og tókst að komast á honum til fjórhlauparans. Ekki mátti nú miklu muna því björgunarbílinn gleypti bara fjórhlauparann í einum bita, geymdi hann í iðrum sér og brunaði í bæinn, þar sem fjórhlauparanum var ælt upp aftur í heilu lagi & bíður hann nú eftir því að gert verði að sárum hans.

Köttur úti í mýri, setti upp á sig stýri & úti er ævintýri... í bili.

Ævintýralegi skipstjórinn

ps. örfáar myndir af þessu hér

Nóg að gera...

Mon, 30 Jun 2008 17:03:09 GMT

já, það vill svo skemmtilega til að alltaf virðist vera nóg að gera þó manni takist að klára ýmislegt.
Brettið var rifið af fjórhlauparanum um daginn og barið aðeins til áður en því var skellt aftur á og vantar núna bara 2-3 skrúfur til að innrabrettið hætti að rekast í, verður sú viðgerð látin duga í bili.
Skellti mér í urriðasvæðið í Ytri Rangá í gær og varð ekki var við að það væri slor í þeirri stórkostlegu á. Umhverfið og áin í einu orði sagt stórfengleg, ef það hefði vottað fyrir slori líka þá hefði þetta verið þrælmagnaður túr, en öngullinn fékk bara að hanga í rassgatinu á heimleiðinni í staðinn.
Veiðivötn eru næst á dagskrá og þarf aðeins að klappa fjórhlauparanum betur fyrir það ferðalag, og svo kom upp sú skemmtilega hugmynd að kippa fjórhjólinu hans Inga með í þann túr. Því fylgir að sjálfssögðu smá vesen, sem er að koma því í lag, varahlutirnir eiga að vera komnir í tollinn, en það á eftir að sjá hvort þetta sé allt rétt, rífa í sundur og pússla svo saman aftur.
Þar sem allar myndir hafa verið teknar á vélina hans Sissó undanfarna daga, þá stefnir allt í voða með það og engar myndir berast þar sem það er allt að klikka hjá honum að uploada þeim á netið, þannig að myndir verða bara áfram væntanlegar... vonum að þær berist á endanum.

Myndalausi ferðalangurinn

Arnarvatnsheiði 2008

Tue, 24 Jun 2008 16:11:09 GMT

Komið öll sæl og blessuð,

Ævintýralegu veiðimennirnir búnir að fara í fyrsta stangveiðitúr sumarsins og að sjálfssögðu stóðu jarlarnir fyrir sínu.

Á miðvikudeginum var brunað upp á Arnarvatnsheiði og mikið veitt, var það sannkölluð veisla, fiskur á næstum hverju kasti og svaka stuð bara, endaði það kvöld á því að við grilluðum humar með hvítlauksmjöri og fínheitum, ekki margir sem hafa slíka veislu uppá heiði.

Fimmtudagurinn byrjaði með rólegheitum og við Sissó skelltum okkur á gott ferðalag og fórum að veiða í fjarlægu vatni, hávaða rok skemmdi mikið fyrir okkur og ákváðum við því að færa okkur um set. Á leiðinni til baka, tókum við vitlausa beygju og ákváðum því að sjá hvert slóðinn lægi, þetta ferðalag okkar færði okkur í áður óþekktar ógöngur og eftir mikið hjakk í stórgrýti og vörðu eltingaleik, þá komust við loksins niður á greinilegan slóða. Við fylgdum honum eins og leið lá, þar til við komum að frekar blautu svæði og ákváðum aðeins að prófa drusluna sem endaði með því að við settum hann á bólakaf í drullu. Við tók margra tíma mokstur með einni dvergaskóflu sem var í bílnum, sem betur fer. Eftir óheyrilega mikinn mokstur á mold, drullu, leðju, „sementi“ og ég veit ekki hverju, þá fórum við að hrúga steinum allt í kringum bílinn og böðluðum honum upp.
Ekki tók betur við, því þegar við reyndum að snúa við, þá festum við hann aftur, þó ekki jafn illilega og vorum við ekki jafn lengi að losa hann í þetta skiptið. Næst tók við að reyna að koma honum yfir smá mýrarspildu sem hafði heftað för okkar á þessari leið og endaði það með því að okkur vantaði ekki nema ca 1 meter í viðbót upp á þurrt og eftir margar tilraunir, þá gáfumst við upp og hringdum á hjálp. Hjálpin barst 3 tímum síðar og var ekki lengi að kippa bílnum á þurrt, við því tók svo óbyggðahjakk til baka í tjaldbúðirnar og vorum við komnir inn í tjald þegar liðið var langt undir morgun.

Föstudaginn ákváðum við að nýta aðeins til að klára kvótann og eftir nokkra tíma var ákveðið að halda heim á leið, við vorum bara á lullinu ofan af heiðinni og viti menn, þá dettur vinstra framdekkið undan bílnum, sem betur fer vorum við ekki á 90 km hraða á malbiki. Frambrettið beyglaðist í döðlur svo og innrabrettið og stigbrettisendinn, nánar hefur það ekki verið skoðað og er vonast til að tjónið sé ekki meira. Engu að síður bíður okkar það skemmtilega verkefni að kippa þessu í liðinn fyrir næstu ferð, því ekki er langt í hana.

Ævintýralega veiðimaðurinn

ps. myndir koma síðar

Sumarið er tíminn...

Fri, 06 Jun 2008 14:51:50 GMT

sem Magnum er notaður!
Já það held ég, kláraði allt um síðustu helgi og hefur þetta bara verið eintóm hamingja síðan þá, allt komið saman og virkar. Mig rámar í að hafa lofað einhverjum myndum af gripnum tilbúnum og fá þær að fljóta hérna á eftir.

Annars er aðalstressið núna að klára að laga jeppann fyrir Arnarvatnsheiðina... það er orðið skuggalega stutt í þann túr.

En í öðrum fréttum er það helst að það verður að öllum líkindum svaka veisla þann 14. júní. Steina að útskrifast og að nafninu til á þetta að vera uppbót fyrir veisluleysið í síðasta mánuði.

Meira síðar,
Summertime

Birthdayboy

Fri, 23 May 2008 15:53:14 GMT

Það er ekki annað hægt að segja en að sumarfílingurinn sé farinn að umlykja mann með hækkandi sól og afmæli, því jú það er alltaf vorboðinn ljúfi að eiga afmæli. Dagurinn stefnir í að verða alveg frábær og ekki tekur verri helgi við, þó að hætt hafi verið við teitið á mínu heimili, þá vantar ekki önnur teiti, Ísland að "meika það" í evrósjón og ég veit ekki hvað.

Sveitaferðirnir síðastliðnar helgar voru alveg hreint út sagt frábærar, alltaf svo gott að komast úr bænum. Ingi og Sissó kíktu með hjólið á mig í Borgarfjörðinn og þó svo að hjólið hafi ekki lifað ferðina alveg af, þá skaddaðist enginn og var svaka stuð hjá okkur.
Steina sýndi svo þessa fínu bóndakonu takta í sauðburðinum og tók á móti nokkrum lömbum á meðan Gullinn lék við Kát og kláraði þá litlu orku sem eftir var frá helginni áður.

Bílamálin eru öll að skríða saman, BMW fullkláraður og vel það, lítið eftir með Magnum og 4Runner gengur vel, enda eru önnur áhugamál farin að láta á sér kræla.

Takk fyrir allar hamingjuóskir,
birthdayboy

Flakkið að hefjast

Thu, 08 May 2008 16:54:17 GMT

Já nú styttist sko í að maður fari að flakka um landið þvert og endilangt, Borgarfjörður um næstu helgi, sveitin þarnæstu helgi og ætli maður haldi ekki bara brjálað afmælis/eurovision teiti helgina þar á eftir. Myndir þú mæta??

Ætli maður reyni svo ekki að troða inn smá veiðitúrum og jeppaviðgerðum þarna einhversstaðar á milli. Jeppinn þarf að vera orðinn tipptopp um miðjan júní þegar krefjandi veiðiferðir fara að kalla á mann og ekki veitir af að dusta rykið af veiðigræjunum og athuga hvort maður kunni ennþá að kasta þegar alvara lífsins tekur við.

Annars er það að frétta úr bílamálum að aularnir í us and a klúðruðu sendingunni á ljósinu fyrir Magnum, en það er núna komið í réttan farveg og verður vonandi komið tímanlega fyrir norðurferðina. :)
Ekki er ég búinn að skipta BMW fyrir fjórhjól, þó að Ingi sé stöðugt að pressa á það, en áhuginn á honum virðist vera að kvikna aftur hjá fólki í bílaleit og býst ég ekki við að vera í vandræðum með að láta hann fara þegar hann verður búinn að fá smá yfirhalningu hjá bónfagmanni 8)

Verðandi ferðalangur & ellismellur out.

Allt að gerast

Wed, 30 Apr 2008 11:25:03 GMT

Já, það er alltaf eitthvað að gerast hjá kallinum.
Beamerinn er kominn með nýsprautað húdd, nú þarf bara að reyna að massa restina af bílnum, þá ætti hann að vera orðinn þokkalega sleipur.
Við kláruðum að rífa Rauða dýrið um helgina og sótti Vaka restina á mánudaginn. Ekki amalegt að fá 10.500 krónur fyrir að skrifa á pappír. Einnig erum við búnir að selja slatta af varahlutum úr bílnum og þar af leiðandi styttist í að Græna dýrið verði tekið í yfirhalningu.
Magnum er enn eineygður og bólar ekkert á þessu fjandans ljósi sem mig vantar til að geta klárað gripinn.

Á síðasta sólarhring er ég búinn að fara álíka mikið í bíó og á meðal ári, þ.e. tvisvar sinnum, fór með Steinu á Forgetting Sarah Marshall og Sissó á Iron Man. Verð ég að játa að þessar tvær voru bara hreint út sagt fínustu myndir.

Hjólið fékk yfirhalningu samdægurs um daginn og er það allt annað líf, geta loksins farið að hjóla með Gulla, honum finnst það sko ekkert leiðinlegt.

Svo skelltum við Sissó & Ingi okkur austur fyrir fjall um daginn til að sækja 4hjólið hans Inga, brugðum við á það ráð að fara á OFUR-PONY og ótrúlegt en satt þá átti hann ekki í miklum erfiðleikum með að draga það. Nú er bara að láta ekki undan þrýstingi og fara og kaupa slíkan grip í einhverri vitleysu.

Eins og sést á meðfylgjandi mynd, eru afturlærisvöðvarnir í pony orðnir eitthvað þreyttir og veitti ekki af smá sterasprautu.

Alhliða brasarinn

Alltaf eitthvað vesen

Tue, 22 Apr 2008 16:21:58 GMT

Já 2008 ætlar greinilega að vera vandræðaárið mitt, því eins og allir vita er ég nú ekki búinn að komast klakklaust frá þessum bílaæfingum mínum... sem eru enn í gangi (nenni ekki að skrifa allt brasið í kringum það), heldur bætist bara stöðugt í vandræðahópinn.

Pabbi keypti loftskrall í síðustu viku til að létta okkur vinnuna við að rífa Rauða Dýrið og það er bara eitthvað drasl, hann á að fá nýtt í dag.

Ég keypti mér nýtt reiðhjól á laugardaginn, þar sem gamla hjólið mitt gaf endanlega upp öndina. Á sunnudaginn ætlaði ég að taka nýja hjólið í prufutúr með Gulla og viti menn, það er eitthvað gallað, þannig að ég fór með það til baka í dag og vona að þessu verði bara kippt í lag hið snarasta.

Hátalararnir í sjónvarpinu eru orðnir eitthvað þreyttir, það surgar smá í þeim þegar maður hækkar almennilega, það finnst mér léleg ending enda er sjónvarpið ekki nema ca 1 árs.

Útkastararnir á byssunni minni eru farnir að syngja sitt síðasta, annar hættur að virka og hinn orðinn frekar hás, giska samt á að þetta sé af sökum svartfuglsveiðinni í vetur, en ég meina common, ég smurði allt draslið bæði fyrir og eftir túrinn.

Hvað skyldi verða næst til að klikka hjá mér?? 7-9-13

Annars er planið að vera duglegur í jeppastússi næstu daga og ákvað ég því að smella inn "before" mynd af Rauða Dýrinu, að vísu er kastaragrindin komin af á henni.

og svo eru hérna 2 af þeim bræðrum

Vandræðagemlingurinn

Magnum, back on the streets

Thu, 17 Apr 2008 10:31:54 GMT

Já það held ég nú, á þriðjudagskvöldið fékk ég nýja felgu, dekk og miðjurnar í hinar felgurnar sem vantaði undir Magnum-inn og er ég búinn að vera á honum síðan í gær og get varla hætt að brosa, það er bara svo gaman að keyra þetta kvikindi 8) (þó að það vanti annað framljósið á hann)

Að vísu dregur svoldið úr glottinu að það er einhver fjandans kverkaskítur farinn að gera óþægilega vart við sig og heilsan er ekki alveg sú besta, en það hlýtur að lagast fljótlega.

Driverinn